Rostros do país: Carlos Quiroga

O escritor Carlos Quiroga pertence á xeración que viviu o final do franquismo na adolescencia e viu mudar a situación legal da lingua galega na súa mocidade. Doutor en Filoloxía Galego-Portuguesa, é autor de diversas obras de poesía, narrativa, teatro e ensaio. Defender a unidade lingüística do galego e do portugués e aplicalo na escrita, pechoulle todas as portas en Galicia, mais abriullas no mundo lusófono. Nos últimos anos investigou sobre as orixes galegas de dúas figuras fundamentais da literatura portuguesa: Eça de Queirós e Fernando Pessoa. Carlos Quiroga recibe á equipa de Nós Televisión na Facultade de Filoloxía de Santiago de Compostela, onde é profesor, para conversar sobre a súa paixón pola escrita, o reintegracionismo e o papel que no mundo lusófono pode ter o galego.